Cyfieithu ar y Pryd ym maes Iechyd a Gofal Cymdeithasol

Gallwn ddarparu cyfieithu ar y pryd ym mhob sefyllfa, gan gynnwys digwyddiadau bach neu fawr.  Gallai’r rhain fod ar-lein, mewn person, neu gymysgedd o’r ddau. Er enghraifft:

Ni yw’r darparwr gwasanaethau cyfieithu Cymraeg Bwrdd Iechyd Caerdydd a’r Fro, Cyngor Caerdydd, a sawl sefydliad sector cyhoeddus arall.

Mae gennym 28 mlynedd o brofiad o ddarparu cyfieithu ysgrifenedig ac ar y pryd o’r ansawdd uchaf.

Ein dyletswydd yw sicrhau bod gweithwyr gofal iechyd proffesiynol yn gallu darparu gwasanaeth effeithiol a phroffesiynol pan mai Cymraeg yw’r iaith sydd orau gan y claf, y defnyddiwr gwasanaeth neu’r aelod o staff.

Mae ein Tîm Cyfieithu ar y Pryd yn cael ei arwain gan ein Prif Gyfieithydd ar y Pryd ac mae’n cynnwys gweithwyr proffesiynol profiadol a chymwys. Mae holl aelodau’r tîm wedi cwblhau Tystysgrif Ôl-raddedig mewn Cyfieithu ar y Pryd, ac mae 2 aelod o’r tîm wedi ennill achrediad cyfieithu ar y pryd Cymdeithas Cyfieithwyr Cymru.

Mae Caerdydd dwyieithog wedi ennill statws sefydliad achrededig gyda Chymdeithas Cyfieithwyr Cymru.

 

Cwrdd â’r Tîm

Bathodyn Cymraeg Gwaith Iaith Gwaith

Ffordd syml i staff ddangos eu bod yn siaradwyr Cymraeg neu’n ddysgwyr yw drwy wisgo bathodyn neu gortyn gyda logo Iaith Gwaith. Bydd llawer o siaradwyr Cymraeg yn adnabod y symbol hwn ac yn gwybod eu bod yn gallu siarad gyda’r aelod hwnnw o staff yn Gymraeg.

Os ydych chi eisiau bathodyn neu gortyn, cysylltwch â ni.

Mae ychydig o Gymraeg yn cael effaith fawr

Mae Strategaeth Mwy na Geiriau yn dathlu effaith dysgu Cymraeg. Gall staff sydd ag unrhyw lefel o Gymraeg, wrth ymgysylltu â defnyddiwr gwasanaeth sy’n siarad Cymraeg, ddefnyddio ymadroddion syml i’w helpu i deimlo eu bod yn cael eu cefnogi ac i deimlo’n fwy cyfforddus.

 

Rhoi gwybod i bobl

Mae’r Cynnig Rhagweithiol yn ymrwymiad yn Strategaeth Mwy Na Geiriau y bydd darparwyr iechyd a gofal cymdeithasol yng Nghymru yn ymestyn y cynnig o wasanaethau Cymraeg yn rhagweithiol. Boed ar lafar neu gyda chwestiwn mewn ffurflen, gofynnwch i ddefnyddwyr gwasanaeth beth yw’r iaith sydd orau ganddyn nhw. Dyma’ch cam cyntaf tuag at ddull mwy dwyieithog.

 

Darparu gwasanaeth yn ddwyieithog

Mae cyfieithu ar y pryd yn hwyluso sgyrsiau dwyieithog gyda gwasanaeth cyfieithu byw sydd o ansawdd uchel. Os yw defnyddiwr gwasanaeth yn dewis siarad yn Gymraeg, gall wneud hynny, a bydd yn cael clustffonau i glywed cyfieithiad gair am air.

 

Defnyddio sgiliau Cymraeg

Mewn lleoliad grŵp, nid oes angen i staff sy’n siarad Cymraeg newid i’r Saesneg gan y gall pawb ddilyn y sgwrs gyda chlustffon cyfieithu ar y pryd.

Rydym bob amser yn argymell yn gryf y dylai gweithiwr proffesiynol sy’n siarad Cymraeg gynnal y drafodaeth gyda chlaf sydd wedi mynegi dewis i ddefnyddio’r Gymraeg, lle bo hynny’n bosibl. Gallwn gefnogi lle nad yw hyn yn bosibl neu lle mai dim ond rhai aelodau o staff sy’n gallu defnyddio’r Gymraeg.

 

Straeon Llwyddiant

Ask Suzanne

Rydym wedi addasu ein gwasanaeth i gefnogi staff i wrando ar gyfarfodydd misol Ask Suzanne gyda sianel Gymraeg bwrpasol.

Gwasanaethau Cymdeithasol

Rydym wedi galluogi teuluoedd sy’n siarad Cymraeg i fynegi eu hunain yn eu hiaith gyntaf lle nad oedd yn bosibl darparu gweithiwr cymdeithasol a oedd yn siarad Cymraeg.

Cyfweliadau

Rydym wedi cefnogi ymgeiswyr i ddefnyddio’r Gymraeg mewn cyfweliadau swydd, gan ddarparu cyfieithu ar y pryd i ran o’r panel neu’r panel cyfan.

Asesiad Clinigol

Rydym wedi cynorthwyo mewn asesiadau clinigol, gan addasu ein gwasanaeth yn ôl anghenion y claf a gweithwyr gofal iechyd proffesiynol.

Gwahodd siaradwyr i gyflwyno yn Gymraeg

Gallwch fod yn eiriolwr gwych dros yr iaith drwy annog pobl eraill, p’un a ydych chi’n siarad Cymraeg eich hun neu beidio. Os yw rhywun sy’n siarad Cymraeg yn cyflwyno o flaen cynulleidfa, beth am ei annog i wneud hynny yn Gymraeg, gyda chyfieithu ar y pryd? Bydd ein tîm cyfieithu yn gweithio’n agos gyda chi i baratoi a gwneud yn siŵr bod y profiad o wrando ar y cyfieithiad yn brofiad pleserus i bawb sy’n mynychu.

Cyfieithu ar y Pryd ar Teams

Mae amserlennu cyfieithu i gyfarfod Teams yn hawdd ac yn gost-effeithiol. Mae hon yn ffordd wych o ddod â phobl at ei gilydd mewn cyd-destun dwyieithog a bydd Caerdydd Ddwyieithog gyda chi bob cam o’r ffordd i’ch helpu i roi’r gosodiadau cywir ar waith.

Cymorth technegol

Rhwng clustffonau, cyflwyniadau, sianeli cywir, Wi-Fi, gwrthdaro tonfedd, ffrydio byw, gwahanol feicroffonau a mwy, oes wir modd ychwanegu cyfieithu ar y pryd i’r gymysgedd?

Oes! Rydym yn ymfalchïo mewn creu lle i’r Gymraeg, beth bynnag fo’ch anghenion. Mae gennym hefyd yr arbenigedd a’r profiad i ofalu am yr ochr dechnegol. Mae hyn yn eich galluogi i ganolbwyntio ar drefnu digwyddiad gwych.

Ymddiriedaeth a chyfrinachedd

Mae cyfrinachedd yn flaenoriaeth i ni, ac mae ein systemau yn gwneud yn siŵr ein bod yn dilyn deddfwriaeth diogelu data. Rydym yn gweithio gyda chi i ddylunio’r broses orau ar gyfer eich cyfarfod neu sefyllfa sy’n parchu hawliau, cyfrinachedd ac urddas eich mynychwyr.

Efallai y bydd mynychwyr yn dibynnu arnom mewn sefyllfaoedd sensitif neu gyfrinachol iawn, ac ni fyddwn yn eu gadael i lawr.

Ein nod yw i berson allu mynegi ei hun yn yr iaith sydd orau ganddo yn hyderus. Byddwn yn darparu cyfieithydd gyda phrofiad yn y materion dan sylw yn ogystal â’r hyfforddiant priodol ar gyfer y sefyllfa benodol.

Mwy na Geiriau

Mae Mwy Na Geiriau yn gynllun 5 mlynedd gan Lywodraeth Cymru i wella profiadau defnyddwyr gwasanaeth yng Nghymru ym maes iechyd a gofal cymdeithasol lle mai Cymraeg yw eu hiaith gyntaf neu’r iaith sydd orau ganddynt.

Mae Mwy Na Geiriau yn tynnu sylw at yr effaith y gall gofal sy’n cael ei ddarparu yn iaith gyntaf neu ddewis iaith y claf ei chael ar ganlyniadau a phrofiad cyffredinol. Yn aml, mae derbyn gofal yn yr iaith gywir yn angen.

Cysyniad allweddol yn Mwy Na Geiriau yw’r Cynnig Rhagweithiol. Mae hyn yn golygu y bydd gwasanaethau iechyd a gofal cymdeithasol yn gwneud yn siŵr eu bod yn darganfod yn rhagweithiol p’un ai Cymraeg yw dewis iaith y defnyddiwr gwasanaeth.  Gall hyn fod mewn sgyrsiau gyda’r unigolyn neu ei deulu, a thrwy gynnwys cwestiwn am ddewis iaith mewn ffurflenni. Er enghraifft:

Os nad ydych yn siŵr am eich gallu i ddarparu’r gwasanaeth hwnnw yn Gymraeg, gall cyfieithu ar y pryd fod yn ateb effeithiol mewn llawer o achosion.

Dyletswydd Ansawdd

Mae’r Ddyletswydd Ansawdd yn nodi’r safonau gofal y bydd Byrddau Iechyd a darparwyr gofal cymdeithasol yn atebol iddynt. Fel rhan o’r ymrwymiadau hyn, disgwylir y dylai gwasanaethau:

• Weithredu o dan y ddealltwriaeth bod gwasanaethau iechyd yng Nghymru yn cael eu darparu o fewn cenedl ddwyieithog
• Cynnig gwasanaethau yn Gymraeg yn rhagweithiol yn hytrach na bod pobl yn gorfod gofyn amdano
• Ymgorffori ystyriaethau iaith Gymraeg mewn diwylliant ac arweinyddiaeth
• Cynnwys y Gymraeg (defnydd o’r cynnig rhagweithiol a straeon staff) mewn adroddiadau ansawdd

Yr egwyddor o beidio â thrin y Gymraeg yn llai ffafriol

Mae Mesur y Gymraeg 2011 yn nodi’r egwyddor bod yn rhaid i gyrff cyhoeddus yng Nghymru beidio â thrin y Gymraeg yn llai ffafriol na’r Saesneg. I ddarparwyr gofal iechyd, mae hyn yn golygu meddwl am brofiad defnyddwyr gwasanaeth a sut y gellir cyflawni cydraddoldeb i’r rhai y byddai’n well ganddynt gael mynediad at y gwasanaeth hwnnw yn Gymraeg.

Gofyniad i ddarparu gwasanaethau yn Gymraeg

Mae Safonau’r Gymraeg yn gosod gofynion penodol i sefydliadau, gan gynnwys darparu cyfieithu ar y pryd.  Mae enghreifftiau o safonau sy’n gymwys fel arfer i fyrddau iechyd sy’n ymwneud â chyfieithu ar y pryd yn cynnwys y canlynol:

• Safonau 21, 22A, 25, 28, 29 – y gofyniad i gynnig yr opsiwn i gymryd rhan yn y Gymraeg mewn unrhyw gyfarfod, cynhadledd achos, ac i hwyluso hyn gyda chyfieithu ar y pryd lle bo angen.
• Safon 84, 87, 108 – y gofyniad i gynnig yr opsiwn i gymryd rhan yn y Gymraeg mewn achosion mewnol rhwng staff gan gynnwys cwynion, gweithdrefnau disgyblu a recriwtio.

Yr hawl i siarad yn Gymraeg

Mae Rhan 1 o Fesur y Gymraeg 2011 yn rhoi’r hawl i bob unigolyn yng Nghymru siarad Cymraeg.  Mae Rhan 6 yn rhoi’r pŵer i Gomisiynydd y Gymraeg ymchwilio ac o bosibl ddirwyo unrhyw sefydliad yr honnir ei fod wedi ymyrryd â’r hawl hon.

Mae gan Bilingual Cardiff brofiad o gynghori swyddogion a sefydliadau ar eu dyletswyddau cyfreithiol.  Gallwn wneud yn siŵr bod y gwasanaeth cyfieithu ar y pryd a ddarparwn  yn un sy’n bodloni’r gofynion cyfreithiol ac yn cefnogi defnyddwyr gwasanaeth i arfer eu hawl i ddefnyddio’r Gymraeg yn gyfforddus.

Achrediad, proffesiynoldeb, DBS a diogelu data

Mae pob un o’n cyfieithwyr wedi’u hyfforddi a’u hachredu’n llawn i sicrhau bod ganddynt y sgiliau priodol i ymgymryd ag ystod o waith.  Mae hyn yn cynnwys sefyllfaoedd sy’n ymwneud ag iaith dechnegol neu faterion sensitif.

Rydym yn sicrhau ein bod yn arddel arferion sy’n parchu deddfau diogelu data ym mhob achos. Trwy gael eu hachredu, mae ein cyfieithwyr yn ymrwymo i God Ymddygiad Proffesiynol Cymdeithas Cyfieithwyr Cymru.

Mae pob cyfieithydd wedi cael gwiriad DBS.

Profi am ddim

Ni fyddwn yn codi unrhyw gostau am unrhyw gyfarfod i drafod eich anghenion cyfieithu neu ar gyfer cyfarfodydd byr i brofi gosodiadau cyfieithu.  Byddwn hefyd yn hapus i ymweld â safle cyn digwyddiad i gynnal prawf cyfieithu ac ni fyddwn yn codi tâl am hyn oni bai bod y lleoliad y tu allan i Gaerdydd neu bod angen ein presenoldeb am fwy na hanner awr.

Offer

Rydym yn defnyddio offer o’r radd flaenaf a ddatblygwyd gan Sennheiser.  Mae’r offer gwydn o ansawdd uchel hwn yn darparu sain glir.  Maen nhw hefyd wedi’u cynllunio i fod yn rhwydd eu ddefnyddio.

I ddefnyddio’r offer, nid oes angen clicio botymau.  Mae ein dyfeisiau yn awtomatig yn troi ymlaen pan fyddant yn gwisgo ac yn diffodd pan na fyddant yn cael eu gwisgo mwyach. Mae hyn yn helpu i arbed pŵer.

Mae ein hoffer wedi cael llawer o adborth cadarnhaol gan ddefnyddwyr.

Hylendid

Mae’n bwysig bod cwsmeriaid yn teimlo’n ddiogel gyda ni.  Rydym yn diheintio’r holl offer yn llawn cyn ac ar ôl pob defnydd.

Iechyd a diogelwch

Mae ein hoffer, sydd o ansawdd proffesiynol ac wedi’u datblygu gan frand dibynadwy, yn gwbl ddiogel i’w ddefnyddio ac nid oes unrhyw wifrau na pheryglon baglu. Byddwn yn gweithio’n agos gyda chi i ymateb yn briodol i bob mater iechyd a diogelwch.

Anghenion ychwanegol

Mae gennym hefyd ddyfeisiau sy’n cysylltu â chymhorthion clyw, felly os oes pobl yn defnyddio cymorth clyw yn eich digwyddiad, gallwn ddarparu ateb ar gyfer y sefyllfa hon.

Beth bynnag yw’r angen, byddwn yn gweithio gyda chi i sicrhau datrysiad cyfieithu amserol.

Yswiriant

Mae gennym yswiriant indemniad cynhwysfawr.